TUNGE KA NIH A, TUNGE KEIMAH ?

Rilru hah tidam tur leh boruak thengthawnuam dawn tumin nasa takin ka bei a, harsatna leh manganna in min bual atna atangin tal chhuak dan a awm thei dah lawng maw tiin thei leh thei lovin taksa nawmna leh rilru damna zawng turin tlangchhipah ka lawn a, harsa ti tak chungin chu tlang chu a chip ka han thleng ve rawi a, ka duh leh ka rin ang ngeiin chu tlangchip chu a lo nuam hle mai, thut hmun kan rem fel sauh sauh a, chhimlam atangin thli rawn thaw heuh heuh a, chu thli rawn thaw heuh heuh chuan ka rilru hahna tamtak chu a len bo ta ni hialin ka inhria, ka dam sawng sawng ni te hian ka hre bawk.

Hun leh kum tamtak liamta a ka nun hluite ka dawn kir mai mai a, chutia ka thut reng lai chuan; thlansa phul kai a lawn ka nih avangin ka taksa chu a lo chau deuh a ni chek ang chu, ka lo hmu hil hman a, ka mumangah chuan ka thil ngaihtuah laite chu ka mang chhun zawm a.

Ka hming tura min phauh sak anga an han au ka hriat chuan keimah ah ni ngei a in rinna ka neih avangin ka eih lauh a, mahse chu eih lauh va chu ngun taka ka han ngaihtuah pawhin tunge a nih a, tunge ka nih reng reng ka in hre thei miah chuanglo a nih chu.

‘Nunna hi thihna, Thihna hi Nunna a ni e,’ an tih fo thin tichiang turte zinga tel ve turin he khawvel eng ka tawng ve tih pawh inhre miah lovin ka lo khawsa ve tanna, tunge ka nih, enge ka nih pawh inhre lovin saisen chunchawi duatlai chu darthlalang no ang maiin keh thei dawm takte a dawmin, hraichawi chunnu luaithlinul ti tam tuah lo chang chhovin, ka leikan thlengin duat takin min enkawl a. Ka rilruah engmah reng a awm lo, ka hmalam hun ka thlir thiam lova, ka hun kal tawh pawh ka dawnkir thiam hek lo, eng hun nge ka tawnlai mek tih pawh ka hrethiam chuang hek lo.

Kum leh hun reitak chutianga ka tal hnu chuan, ‘U A MA’ hmang tlemte aiin ‘U A MA’ lo hmang tam tawhte chu an fing zawk na ngai e, an tih thin ang pawh chu ka la hrethiam chuang pha reng renglo, chu tiang reng renga hun leh kumte ka hman fe hnu ah pawh chuan ka lu chhungah hian Thluak finna a khat aiin Thluak Thawlna a khat hian a la luah hnem zawk zel tih chu hai rual lovin a lo lang chhuak thin.

Lenrual kawm nuam ka tih em avangin lenrual tak tam ka pawl a, A te a lian thlengin, miin “a fing, a A” an tih thlengin ka theih ang tawkin ka kawm ve hlawm a; chutiang bawkin thil tha leh thil thalo te pawh ka theih ang tawkin ka thlir ve bawk thin. Ka tih tum loh tih chang ka ngah a, ka tih tum tih loh chang ka ngah bawk. Mi thenkhatin fel min tih laiin thenkhatin sual min ti bawk a, keimah ah chuan mi hrang hrangin ngaihdan hrang hrang an neih avangin tumah ka mize diktak ah hre thei bawk hek lo, mi rinang ka ni lova, mi rinloh ang ka ni bawk heklo, Kei ngei pawhin miin eng angin nge min ngaih ka inhrethiamlo a, hrethiam tur pawhin miin ka lakah rindan hrang hrang an neih avangin khawi nge dik ber, ti a thutlukna lo siamtur pawhin thutlukna mumal ka siam thei heklo.

Thil thalo ka tih leh ka duh loh em em te ka tih leh thin avangin leh tha ka tih em em tih ngei a ka duh te pawh ka tih loh fo avangin, kei ngei pawh chu ka in ringhlel fo thin. Chutiang ang reng reng a ka khawvel nun ka hman thin avang chuan keimah ah pawh chuan eng ang mizepu nge ka nih ka in en let fo a, ka hrethiam thei silo.

Milian leh mihausa chetin khawlai ah ka che a, inchhung en tlak awm silo, a kawrawng hian a kawrawng em em bawk si. Nimahsela, ka khawsak/awmdan chu ka nihna a ni ve ve a ni tho bawk si. Ka khawsak bul hrelo tan chuan Milian zingah min chhiar tel pawh a ni thei e, a dikna chen a awm a lawm, Kan in chhungkhawsak chuan daihlo mahse ka rilru milen na kha an mi tehfungah ka ngai thei bawk, Kan in chhungkhur hre tan chuan rethei berhte a min dah pawhin an ti dik tho e, Ka rilru a milen na en lovin ka khawsakna an thlir a ni mai a!

Tawngkain ka hausa a, atakah ka neilo a ni ve mai a, tiin inhnemna ka zawng thin. Ka nihna ni a ka hriat leh ka khawsak a in mil silo, ka khawsak ka enin ka nihnatur niin ka hre thei bawk silo, ka khawsakna leh ka nihnaah chuan ka lungawi thei lova mahse tihngaihna ka hrechuang bawk silo. rilru mangang reng rengin hun leh kumte hmang zovin, an liam zel bawk a. Ka thih dawn thleng chuan ka nihna chu ka hre thei ta lova, ka nihna ngei pawh chu hrechhuak ta lo chuan, thlafamrun ka kai san ta, tumahin tunge ka nih a, enge ka nih pawh chu an hrechhuak thei ta biklo, kei ngei pawhin ka ngaihtuah chhuak hman ta silo.

Thawm deuhdut chuan min rawn tiphu chiang kher mai, ka harh zawk chu kan han hawikual chuan ruahthimpui sur tur hi tek nen a lo in mung thim vut vut tawh hi a lo ni a. hmanhmawh takin ka chhohna kawngah bawk chuan ruahnan hman hlauin ka tlan thla vat a, tlanghnuai a run in hmasa ber ka thleng hman tawk tih chuan a maka maka tam ruah a rawn sur ta a, run in lo hmasa ber dithlifarfem hnuaiah chuan ka tlan lut a, thut theihna a nih si loh avangin ruahsur ban nghak chuan a ka ding ta char char, ka rilruah chuan ka mumang mawlh kha a la lang a, ti hian ka ngaihtuah chhun zawm ta a.

‘Kan mimal nun theuh hi in zawt ta ila, Ka nihna chu ka hria a lawm kan ti theuh awm e, “TUNGE KA NIH A, TUNGE KEIMAH ?” mahni nihna hriat loh tluk a thil zahthlak leh nuihzat thlak hi a awm dawn em maw ni le.

Mitdel thil dapin han dap den den ta ila, kan nuih a za hauh lo ang le, Kohhranpuipa ni chung si a Eiruk, Ramhruaitu ni chung si a Ram aia mahni vuah leh vangte hmangaih zawk, Eiruk hua leh nuihzat si a mi eiru tura nawr. Mipui rawngbawl tura sorkar rawih nisi a dawrtu mipuite tana harsatna thlentu, Neih engmah nei silo neilo anga lang hreh, Zirlai nisi a khawlai a hmuhtur tam em em. Heng a chunga mite hi nihna lo ang vek a nung an nih si chuan MAHNI NIHNA HRE LO zingah chhiar telloh theih a nih si loh chuan Kan Nuizatte zingah chuan kan lo tel ve reng a lo ni. TUNGE KA NIH A, TUNGE KEIMAH ? tih hi mahni inzawt nawn fo thin ang u’

Turnipui

Turnipui len kawl an a lo her chhuak a, sirva leh nungchate tualchaina ti nuam an, hringmiten an ianga zaivawr ve turin, an hlimna zahve pawh ka dawng pha ve silo maw!!! keini iangin an damlai nite sei ve se, an hlimnate chu hriat theih leh hmuh theih in romei iangin zam ve se kei tawn ka nuam...an hlimna romei ianga zam vel chu.
Thlasik kawng lo paw chiai mai te hian hringmi tan awm ze thui tak neih tumin, Hringnun her danglamtu an ni si a maw, Mahse a mileng zawng a pa lungmawl leh lungleng mi tan chuan tawrh a har ngei mai, hringmi chunga an thil tumte hi, mahse anka chhuakin an sawi ve silo, trawng theiin anka nem tawng thei ni ila, dam chhung atan, kei tawn ka nuam hringmi lak an thil tumte hi, anka nem a min hlan chu. Kei ka tan chuan dam chhungin ka tawn a an thil hlante chu ka sawi fiah zo awm silo.
Romei lo paw chuk mai te hian thralkhaw mawitu nih tumin leh hringmi lungmawl chawk hlimtu a tran tumin theih tawp chhuah a hmanhlel ni hian an mawi si a maw!! A mi zawnga pa lungleng mi tan chuan tahlai luaithlipui nul zai rel tu mai an chang si;
Chung chhawr thlapui a ni iang reng a, hringnun chawk damlam tu, ransa leh nungcha tinrengte tana nun chawk danglam tu, a mawina eng lawm a zan khaw tai rek thleng a ransa leh nungcha ten zai vawr a an lawm thin chu, a sakhming lem an ‘zan tiang lalnu’ tih hial a an lo sak thin chu. Hringmi iangin a an ka tawng thei ni ila, kei zawh ka nuam a sakhmel mawi na in thup zan khaw thiang reh hnuai chiah a a pho lan thin chu, eng tiang a hlu nge ni ngai le,?
Tuipui zau leh chamdup a tawp leh lam pawh lang theilo, a thuklam pawh hriat phak loh, a thawm pawh hriat tur reng reng awmlo khawp a reh dup; a tluka nun chawk danglamtu leh nun ti hlimtu hi an awm dawn em ni! tiin a mileng tawnah an ka nem in hril ta ila, Mithi zing a phum tlak hialin ka mawi dawn si a maw, a sak hmel mawi na au chhuah pui tur reng reng awm lo, mahse thiam ang tawkin han au chhuahpui ve dawn ila, Pa a zawng a pa tawngkam thiamlo ber tan chuan ka sawi fiah thiam dawn silo a, ‘Thuruk’ a ni e ti ila ka sawifiah thei awm ber e. Hlimna leh lawmna a neih te zawt dawn ila, a reh a reh dup mai si a. Mahse a chhungril lam a awm nungcha te hian a mawina leh nunnemna chu lawmin an dam chhung hun hlim ten a chhungah hian anlo chen ve reng si a.
Zaleng tamtak ten an chhailai D chu chung chhawrthlapui iangin a sakhminglem an ‘zantiang lalnu’ tih hial an sakhmel mawina leh duhawmna chu chhuangin lo vuah sak mahse, kei ka chhailai D leh ka duh ber chu Tuipui reh dup ang maiin ka kiangah hian awm mahse a chhungril mawina leh hlimna petu a nihna pawh chu sawiin au chhuah pui ve lo in ngawih bo pui tum mahse, Lunghlu tha leh manto ber ai pawhina hlu zawk si a.

Ramsiam thatna Politics nilovin Kohhran leh Chhungkua atang zawkin maw le

Kei a kar a B.P.O. atanga ke a ni thum kal a awm leh nghal, khawpui pawh vawikhat mah la hmu leh nghal, i rinna i dampui e tih ang deunin kan mizoram chhung hi rinna mittin chungah Zion tarmit nen i han thlir dawn teh ang, Kan tih dikloh emaw kan sawisual a awm chuan ka thla phan loh kha maw thianten Pui i ngaih phawt chuan min rawn pun rawn ngalchat khi khawk tla khawp pawhin kan tlanchhiat pui ang che an tih kha maw tlan chhe ti tihdeuh, chhe lo ti tih deuhin i han chhui kual ang hming.

‘Chanchintha in kan ramah Ramhuai a um bo,’ tih a awm kha maw, i han bel chiang dawn teh ang. Nia, hei thingbul lungbul kan biakna atang pawhin kan kal leh ta duai mai, kum za kan tlinna pawh kum engemaw kal ta ah kan lawm a ni leh ta reng mai. Mizo te hi engang mi zia pu nge kan nih? Kan hrilhlawktu in Tuipui ral a tangin mingo an lo kal anga an thu in lo awih dawn nia a tih avanga awi ngawt em ni kan nih le.

A nih hei kum 100(za) chuang awrh kan kal ta a, Kohhran engzat nge kan nih, kha mingo ho thu min hrilh kha a diktalo em ni tih mai awl rum rum tak a ni. Engvangin nge rinna hran hran kan neih tak tunah, Kristian 100%(za ah za) in tihna ramah hian, enge duh khawp kan hmuh loh, nge kan hmu lutuk a style thar kan zawng zawk. Tunlai hian Evangelist tamtak hian Evangelist dang tamtak hnena piang thar hi an pawm miahlo an mahni tihdan (style) kher a piangthar lo chu an tia lawm, tak tak a nih phei chuan Kistianna leh Piantharna chu thil hrang daih a ni tihna a ni dawn awm si a.

‘Kan Mizoram em em hi chu aw’ ti a ka ngaihtuah laiin thawklehkhatah Uipui in min rawn um thut mai a, kei a feh tur a kal chu ram lo lam pana kan tlan vak tak chu le. Enge Kristianna chu ni ngai reng reng le? Enge piantharna chu ni ngai reng reng le? 100% (za ah za) ti a kan invuah hi nga ti nge ringmiah lo chunga tunah hian i sawi i sawi thin, Kristian vek kan ni sia kan rin miah loh kan sawi kan sawi chuan, kan kristianna kan ring hleh tihna a nih a chu tia keini ber kan chiah tak silovah chuan, Piangthar miah silo Kristian ka ni a tih theih dawn em ni! Vai hian Mizo ka ni e ti se chu tiang vel chu a ni. Enge a chhanna ‘Dawt a sawi tih leh Nui zat’ a ni mai lawm ni, mi nuihzat a hmuhsit kan ching em em hi keimahni hi enge kan nih bik le?

Kan Kohhran inrelbawlna hi han bel chiang lawk teh ang, Kan Kohhran Upa/Khaipa tam tak hi e, Thawhtan atanga inrinni thleng hian Kohhran Upa/Khaipa a nilo a maw. Mahse, Chawlhni chuan e an ka ah pawh zen ila min seh lovang tih tur khawpin an nem ang lawi si a, Thil te te ka hrilhru ang che, Kan Kohhran Upa/Khaipa thenkhat hi e, Zu in thin aiin thenawm an hreh awm zawk. Ram chungchangah te hian e, an upa nihna te hi an dah tha daih a. Thawhtan atanga inrinni tlai thleng hi chuan ‘engpawh tih a thiang’ tihlai kha an chang chawi a ‘mahse a tha vek kher lo’ tihlai hi an bel hnan daiha chawlhni ah a phih thla leh thin a ni awm e .Pathian a piangthar tha aiin Kohhran a thawhlawm thawh tam theiin thusawina hun an chang tam zawk a. Upa ni tur chuan Officer emaw Hausak emaw a ngai a ang ta khawp mai, Pathian a tling ai chuan khawvel a tling ten min kalpui a ang ta tak zet e, Pulpit chang thei tur chuan eiru thei nih angai a sin tihna ang vel chauhin kan awm tak hi. Khawi atanga Sum a lak luh nge kan ngaihtuahlo, a thawh rah liah liau pawh a ni thei a, eiruk pawh a ni thei kan ngaihtuahlo, a thawhtam chuan sande sikul zirtirtu emaw kohhran puipa emaw a ni nghal tawp ang deuhin kan kal ta a ang khawp mai. Kan Minister leh Politician-te hi Kohhran Upa an tam lutuk an ti. Mitdel in mitdel vek min hruai a ni ber e. Awi ah siiiii Mau bulah ke zungpui arhsuk khawpa ka han chhuih chu le, meng kur chunga kan hmuh miah loh theih chu le!

Thalai tan chuan inkhawm ila a tha ber tiin kan in zirtira, ‘I vanglaiin i siamtu hre reng rawh’ tiin kan in fuih sauh sauh a, chhiar pawh kan chhiar tam narawh, nia ti raw in khawm kal pah leh hawn pah a lehlam a Bible zakzeh leh lehlama nula kuah chunga in khawm te chu a nuam a lawm, thalai zawng zawng chak a lawm, tiin in ti thei takin kan kal ang hmawk hmawk a. In chhung khur a hna thawk peih miah lo kha Pawl thil tih ah chuan thingpui dawr ni leng leng pawhin kan nghak peih a ni lawm ni. Mahni thingpui dawr chu nise nghak tha peih a mual kan awm leh tawp chuang nang. Thalai te u a engber ah nge kan chianthar Kohhran pawlah em ni kan chian, Pathian a chiang silo hian kohhran’a chiang kan nih chuan vanram a hnai miahlo a nia aw!.Hman deuh ti ila tun deuh zawk a niang chu KTP.TKP.PYD.etc... zu te an sawi ri ami kha? Kohhran Thalai hian engtik laiin nge zu a neih. Hetianga kan changkanna nen a kan in hmehbel zel dawn a nih chuan nakin lawkah chuan Kohhran Thalai Drugs te pawh la awm ta ve ang. Midang nilovin mahni zawk inbih chian angai tak zet ta e, ‘Pawnlam mawina ka ngai nep em em a, Chungril mawina ka ngai sang’ an tih lawm lawm kha, Chhungril’a chiang silova pawnlam ah chauh kan chian chuan kan thlarau chu kan chhungrilah a awm si a, a nilo zawk hian min kai san mai ang tih a hlauhawm khawp mai.

‘Kan Mizoram Biakin tak hi chu aw’ ti a ka ngaihtuah leh lai chuan; Awi ka rei Patling pui dam nalah chawfun delh pherh duai khawp a kan vei tluk ngut chu le, a na lo e ti rilru chungin i han bai pheih auh auh phawt mai teh tuman min hmuh loh hi auh auh mai a. A nih engtin nge kan Biakin chu? E le kan biakin chu e ‘Ropui tak a ni, Kristian diktak leh Piangthar kan tlem deuh mai pawh a’ tiin kan chhang mai ang tih hlauh awm khawp a ni.Kan Biakin te hi kan in sak mawi siak a, a khir en un mai. A chhungah hian han tawng ila a thawp deuh sat thei leh nghal. Mizoram’a biakin mawi ber leh tha ber neih tumin kan in tlan siak suau suau a, Tam takin ringlo mi sum hmuh dawn avanga inla ring chawp kan chhawr a, Hetah chuan kapu keimah chu ring mawle nasa takin ring nih kha, sawlhni ah pawh thatakin in khawm nih kha, keimahni ramah chuan nangmahni awm ve tawh silova keimahni pathian bak kha rintur awm tawh silo nih kha, bakah nangman keimah hmutawh chuang law duh duh ring ang paw lo reng reng nih kha......

Biakin ropui deuh a ruka ruak hulah hian kan awm ang tih a hlauh awm khawp mai, Hetah hian hmuh thleh lianpui mai kan nei nin a lang tlat mai. Rinna mita chungah Zion Tarmit han vuah chiah hian melh deuh kawk in zuk thlir ila a lang deuh dut dut thei. Kan rin Bible-in nangni hi ka biakin chu in ni e a a ti na mawlh mawlh a, kan hai a nilo maw? thenfai ngailo zawk hi kan lo thianfai anga thenfai ngai zawk hi kan lo thianfailo a niang e. Biak in sak hi a thalo e tihna ni lovin, enge kan sak chhan Mizoram mai bakah rampawn thlenga kan biakin chu tia lar kan duh a ang deuh lo maw.. Biakin tha elhtiang hnuai ah tap purin Min ngaihdam LALPA rawh kan ti deuh reng dawn tihna a ni maw? Awi duh chuang silo ngaihdam duh si kan in hmu khawm leh thap thap dawn tihna a ni mai a... Hawh u.. Kan rin Bible-in a a sawi zawk kan biakin hi thian thianghlim phawt ila, a dang chu ngaihtuah chauh zawk ang u, chuan kan ram ah hian khap ngai a awm tawh dawnlo zuk ni reng zawk a.

‘Enteh saw thianpa i nu saw.. Sermon laiin a muthlu a nia.. A hlim emaw tia’ Chutia kan thlir renglai chuan Sermon a zo a, kan han zai chiah a leh... ‘Thianpa i nu chuan thawhphan pawh a nei miahlo a ni maw, a harh vang hle mai, a rawn dawk zawk mai lam tualah... Hla thlan pawh hi a hre chiang miah in ka ringlo’. E khai hetiang hi kan va tam ve aw, Pathian a hlim nisilo Khuangrau hlimna hi, an vai chuan ka ti ngam hauhlo tamtak zingah hian an in zep tren trun a ni. Pa pakhat chuan ti hian a sawi a ‘Mihlim nu ho hian an pasal te an ngam deuh vek’ a ni tak tak em ni le?.

Khai aw ramthim i han in vei siak teh ang aw!!! Arunachal a lar ber kei chu ka vei ber.. Nia ti raw, vei awm tak an ni, kan Missionary tam tak hian ke a kal trung trung ngaihna hi an vei hreh khawp a sin, Motor leh inlak changkan theihna lo chu an vei tha duh miah lo a ni awm e. Pathian’a ching tak tak lo tan chuan a ni reng ang chu, a nuam chin a Missionary te chu kan thiam ve tho a lawm tu pawhin. Pawnlam a inhmuam up a chhunglama tih deuh hâ that na lai te pawh a awm a nia. A then in kan thlang ram vai an vei a, a then in China, a then in khawi khawi emaw, England te pawh kan vei nawkin ka hria an sawi rik thawm, Kan thleh deng deng lutuk han tih lemah kan vei chak lutuk. Kan Mizoram hi kan thlang vai min vei fe fe tu hian an rawn tlawh reng a ni tih hriat tur. Kan vei a te hian min vei let a nih hi maw le... Kan Mizoram hi vei ila, mahse thenawmte vei miah loh tur an ni pawhin min vei ve em em tih hriat tur mahni in chhungkhur pawh siamtha theilo in a thenawm te va vei daih chu a mawilo ngai. A hmasa berah kan in chhungkhur vei ila, kan siam that hnuah chuah ah thil dang leh hmun dang vei ila, mitin in kan inchhung khur kan vei a, kan chinfel theih chuan kan Mizoram ah chuan Kristian 100% kan lo awm anga, in ringhleh lovin kan sawi pap pap ngam tawh anga, chu mi hnu ah chuan kan state pawn leh ram dang vei ila, chu chu Pathian’in a duh dan zawk a nih ka ring.

Ram siamtha tur chuan pawnlanga Pathian ring lova, a nuna kan nunpui hnuah Kohhran leh Politics hmangin kan siam tha leh thei ang. Chutah tak chuan Kristian diktak vek kan lo ni tawh ang a Kohhran nung Pathiam awmpuina hnuai atangin Politics a lo tha ang a, Ram nuam leh mite awh ramah a lo chang thei ang.

Kut zungpui inhlei nleh chimawm

15/05/07

"Tunlai Aizawl a pui a pang ho chu an a zo tawh an chet phung reng a mak e mai! Chempui, tuthlawh leh Chemkawi vawn nilen nen chuan a dang khawp mai! beng lehlam hupin an kal nui vur vur a, a khat tawkin an sik leh ang zeuh zeuh a."

Tuthlawh leh chempui hum nilen leh Mobile phone nilenga vawn chu in thlau tak a ni.

Tunlai thiamna lo sang zel hian kan Zoram pawh min hruat tel ve zel tawh a nih hi. Computer Age atangin Mobile World ah kan pakai mek zel a, ' a nei lovin neih an chak a, a nei tawh ten a aia tha leh changkang an zawng.' A pui a pang, a rethei atanga hausa ber thlengin neih kan tum vek tawh a nih hi. Mahni hlawh chu sawi loh mahni pawh la in chawm zolo thlengin neih kan tum a, Zing atangin zanlai thlengin kan sik neuh neuh a, kan kut zungpui a 1,2,3.. leh a,b,c.. bet thut khawp hian kan in sik hlum teh dawn zawng a nih hi. Mi sumdawnna man chawilo ni hek suh Kan Mobile chul leh khawlh peih tluk hian Bible te hi han khawih peih ila, hriat loh kan neih tawh pawh ka ring lo. a bung leh chang, a awmna te hi a phek number nenlam hian a awmna kan sawi vek theih ka ring.

A ni teh tak a sin, In enfiah a ngai khawp mai, kan mamawh leh tangkai ah nge kan hman a dawtbur, zahmawh bawm leh zahmawh sawi nan nge Nu leh Pa thenkhat nupui/pasal thlim a, tawngka leh rilru uire nan, a takah pawh a min hnuk lut ta ve ang. kan thatpui rualin kan chhiatpui teh zawng a nih hi.

Mobile thapui kan nei a, thil dah that theihna lian pui pui kan vuah bawk a, mahni thawhchhuah a lei chu thalai te zingah an vang pharh mai nia. Nula te u, tlangval te u Mobile nei tha nazawng hi an tha vek kherlo a ni tih hriat tur, mualpho na leh zahna khurah a hruai lut dah ang che.

Khai aw a tawp dawn lamah tan inla teh ang aw, a tawpna hi a bul tanna zawk a ni e; Tunlai thlaite zingah mipat hmeichhia a hluar kan ti a, engah nge a hluar loh ang! tunlai kan kutzungpui in a sih ngun ber kan mobile a thu dawn leh pek chhuahte hi zahmawh rawngkai a va han tam tak em. thalai mai a nilo, tha lai mai pawh a nilo nu leh pa pawh kan bang chuang lo a nia aw. nu leh pa ten kan hriat a kan chin tawh chu thlai te chuan an ching pharh fe tawh tih hriat tur, tunlai thlaite hi an fin tawh em hi.

Heng zahmawh rawngkai hi a thu (message) mai pawh nilo tawngka ngei pawhin kan dawng fo zuk nia leh! nula, nu, tlangval leh pa thenkhat an biaktum number an tihsual avanga a dawnglo turin a lo dawn palh a awm fo mai. heng an number te hi TV leh chanchinbu ah chhuah duh ila chuan nula, nu, tlangval leh pa thenkhat zak fe fe tur an katnawk ang.

Chawlhni a lo ni a, chawlhni chuan Sande Sikul-ah a then zirtirtu(puitling/naupang) te an lo ni a, ni lemlo pawh Pathian be turin biakin kan pan tham tham hlawm a. Chawlhni a nihloh chhunga kan mobile chhunga eng engemaw kan dah te kha! Thenkhatin midangte bula ka nei tha a sin kan lo tih thin te kha, kan biak Pathian engkim hmu leh hria hian a hmu ta lo emaw ni, inthlahrunna pawh nei map lovin biakin chhungah kan han pai lut ta chu a nia leh!!!

Sunday inkhawm chhungzawng a chanve Christian, thawhtanni atanga inrinni thleng milem bia te aia nep zawk kan lo nih hi; Hawh u, he khawvel tunlai kan hman uar em em leh kan che lek em em, sum tamtak tak kan sen fo na hi a hmanna tur takah hmang zir ila, Zahmawh bawlhhlawh pui pui bawm a siam lovin, tangkai leh kan mamawh chauh ah hman i zir zawk ang u.

I hlimthla rose par-ah

07/9/2007

“Khi, khi tilai a tang khian zingah kawl en hnu deuh ah a rawn langa, chuan, chawhnu thlang heran khi tilai tlang a hmawng ler chip zawn khi nitina a thlen hun ngaiah chiah a rawn thleng a. Tlai lamah hian, saw saw tilai tlang zawnah sawn khaw thim hma hian a liam ziah a, a hun a vawng dik asin aw,nitin hian a tlai ngai lo reng reng,” tih pah chuan ni in ahun a vawn dik thin zia chu a sawi mawlh mawlh a.

A nih thianpa pangparah hian enge mawi i tih ber tiin kan zawt thut a. Ani chuan, “Rose” tiin min chhang ve mai. Anih rose ah chuan a englai chu nge mawi i tih ber a kan ti leh hram a. “A par bawr lai hi mawi ka ti ber e kei chu”, tiin min chhang leh a.

Pa rothap hmelpui, sek tel tul te pawh hian pangparte hi mawi an lo ti ve tho a ni maw? Kei chu hetiang pa sek tel tul rothap deuhte hi chuan pangparte hi mawiti turah ka lo ring ngai lova. Khawvelte pawh hi ten hluah hluah turah ka lo ngai ngawt a.

Ka zan mu tur chuan dawhkan ‘a rose par lo in khawi chu ka hmu a, chiang deuhin ka han bel ta a. A parte chu a lomawi na ngang mai, a hnahte pawh chu paih a nibawk si lova, chu chuan atih mawi belh chhah mai bakah a landante chu a ti danglam hle in ka hre bawk a. A kuang chu ka han enchain deuh chuan, a hling zawng zawng chu a loin thleh fai vek ka hmuh chuan mak ka ti hman kher mai, mahse a chhan, ‘hling a neih chuan khawih vel ati harsa dawn’ a ni tih chu ka hre leh ta thuai a. Ka mutsan ta a.

Chu rose in khawi chuan engemaw ti taka ka rilru a luah tlat avang chuan nitin in ka en ta thin a.

Chutia ka en ziah tak atanga a nili naah chuan a par fangmal pakhat hi a hnuai zawnah a lo tla a, ka la a ka paih mai a. Chu rose par inkhawi chu kan en chiang a nalh ta lo riaua hriatna ka nei a mahse ka la paih phal ta chuang lova. Nitin hian a par fangmal pakhat hi alo tla ziah mai a, a tawpa tawpah chuan a par chu alo til zo ta veka. Rose a ni tih a kuang awm dan leh a hnah vuai tawh tak atang chuan a la hriat theih hram hram a. Mahse, chu rose-ah chuan mawina pakhatmah a awm tawh loh avangin a kuang chu ka la a bawlhhlawh bawmah ka paih ta a.

A zanah chuan rose chu ka paih tih ka theihngilh avangin en tum a ka kal chiah chu current a rawn awm lo thut ta mai a. Thenawmpa a hma a, Ni in hun avawn dik zia min lo hrilh tu te naute chuan, “A pa current a awm lova ka meng thei lo ania” tia a tah leh an tlangvalin, “Ceiling fan kha han On teh u” a tih leh an nu berin, “Ngai lo, current pawh a awm loh hi, bati a chhem hlum ang” tia an rak nawk nawk chu ka hre thei a. ‘A va han lu hai thlak em’ ka lo ti rilru a, rei vak lo hnuah chuan current chu a rawn awm leh mai a. Ka rose par khawi en tur chu ka hmu ta hauh lo mai, hrilh a hai duh kher mai. Ka paih daih tih ka hriat chhuah leh hnu chuan mutna pindan lamah ka liam san ta a.

Ka mut hilh theih mai loh avangin rose par in khawi mawi ka tih thin em em, a par tlak kawlh tak avanga ka paih tak chu ti hian ka ngaihtuah ta a.

A par chu mihring hmel mawina nen teh khin in, a kuang chu mihring ruangam nen, a hnah a thawkna ber leh mihring ei zawnna nen, chuan a hling chu kan mize tha lo lai nen ka hmeh bel ta a. Thalai kan la nia lawm tiin rose par ka en ziahna chhan kha hmangaihna nen kan teh khin chho leh a, kei patling in ti ve ruah tawh pawh ka tehkhinin a zir vang nge lai deuh riau a in hriatna zuk nei tlat a, nge ka thil la tawn ngai lo nen ka khaikhin vang zawk.

Kan han tlairawl/rawlthar chho chu Rose par mawi tak nen ka han hmeh bel a, a hnah tla ziah chu kum lo upat a kan hmelthatna, duhawmna leh mawina te lo kiamta nen in hmeh riau hian ka hre ta a. Chu Rose a par fangmal han bawrkhawm chuan nalh takin a hmelmawina chu pho chhuakin, mihringte leh rannung te huikhawmtu-ah a tanga, a par fangmal pakhatmai chuan a mawina a pho chhuak zo mawlh silo, a par fangmal te te chauh chu khawi tum mah ila a theih mawlh si loh.

A nih a par han bawrkhawm a chu a kuang atang chuan la thla tai la, a darh chum chum leh si, a kuang chauh chu han khawi dawn ila a par tello chuan mawina reng a nei silo.

A par leh a kuang chu han khawi tai la, a nihtur ang chuan a mawina a lan chhuah pui thei ang, a hnah awm leh awmlo dah duh leh tai la, a hnah awm zawk chu kan thlang ngei ang le, a chhan chu a mawina leh a landan ah a hnah awmlo ai chuan a hnah awm chu a lo famkim zawk si, duh atng tawka khawi tur chuan a hling hleh thlak a ngai mauh si a le.

Hling neilo mai awm engvangin nge hling a neih kher; khawinge ni pawlthum science degree la ka nilawmni, ka hming tawpah ka degree ka dah mailo tih chauh a lawm i han hmuchhuak dawn teh ang. Mihring leh ransa te laka an in ven ve nan a ni mai dawn lawmni, Ninhlei deuhin duh duha a paran lawh/thliar loh nan a hling hmangin a par chu an humhim ve a tih theih bawk ang. A nihloh leh a parmawi mawina inthup hnuai a a tur a ni mai thei bawk, hmelthatna hi hlu in ngaina mah ila, a hmangthiamlo tu tan chuan tur hlauhawm ber, a neitu ti chhethei damchhung hringnun rilru retheihna leh mi anglo a min siamtu ang te pawhin a ngaih theih ang.

Inkhawibah ang deuhin bu i han let leh lawk the ang. A nih Rosepar chu a mawi lai ber a par chu a invuah khawmna ber a kuang/kung tel lovin pe ta che ila I duh tho angem? A kuang a par bawrkhawmna lai tel lo chuan a parfangmal te te in a darh vek anga awmzia reng a neilo. Rose par ang chiah hian mihring hmelmawina leh thatna ringawt hian awmzia reng a neilo, nalh leh mawi taka khawi tur chuan a par, a kuang a awm a ngai a, a hlingte erawh chu I tan chhum thin. Mihring hmelin duhna ringawt te, sumleh pai, eizawnna induhna ringawtte hian awmzia reng a nei silo. Rose pawh I khawi dawn chuan a kung atanga I lakhnuah a hling I thian fai leh thin ang bawkin kan mizia tha lo nen lah vek hnuah in hriatthiamna nen a hling chu kan thenfai a ngai thin.

Rose par pawh rei khawi I khawi a par a lo til a a hnawh a lo vuai thin ang hian, kan thatlai, kan hmelmawina chauh emaw, kan neih rosum chiah emaw hian hlutna leh mawina a nei lo, kan mize thalo thleng pawha min hrethiam tur mihring hi mi zawng zawng mamawh a lo ni zawk, chu chuan damchhungdaih hmangaihnaah min hruai lut zawk.